Incumbenzas

Svilup regiunel

Svilup regiunel regiun Malögia / regione Bernina

Il svilup regiunel da las regiuns Malögia e Bernina es gnieu creo per realiser la „nouva politica regiunela da la confederaziun e dal chantun Grischun (NPR)“. Incumbenza principela da la sviluppedra regiunela Regula Frei es la promoziun, la direcziun e l’accumpagnamaint da progets pel svilup regiunel, la coordinaziun cun las activiteds d’oters actuors locals sün quist sectur e la chüra dals contacts cun las regiuns limitrofas.

A vegnan sustgnieus progets chi haun il böt da valuriser potenziels economics e cotres d’augmanter in möd perdüraivel la cumpetitivited da las regiuns, da s-chaffir plazzas da lavur e da creer valur.

Ils mezs da la NPR paun gnir druvos exclusivmaing pel scopo da svilupper l’economia.

Il svilup regiunel da las regiuns Malögia e Bernina s’occupa da l’Engiadin’Ota, la Bergiaglia e la Valposchiavo. Ils uffizis as rechattan a Samedan, Stampa e Brusio.


Strategia da svilup Engiadin’Ota, Comune di Bregaglia e Regione Valposchiavo

In occasiun da püs inscunters haun discuto rapreschantants da la politica e l’economia da las vschinaunchas da l’Engiadin’Ota scu eir da las vschinaunchas da las duos valledas meridiunelas, cun sustegn da l’uffizi per economia e turissem (UET) e’l secretariat da stedi per l’economia (SECO), las direcziuns da strategia giavüschedas da lur lös e las sfidas chi resultan in quist connex. Quist process es gnieu realiso resguardand l’uffizi pel svilup dal territori dal chantun Grischun (ARE). Cul process „Agenda 2030 Grischun“ s’ho que pruvo da formuler strategias integrelas a basa da las fermezzas e deblezzas da las regiuns (territori funcziunel dal punct da vista socioeconomic). 

Cotres dess gnir creo ün consens traunter las vschinaunchas da la regiun respectiva in vista a las sfidas ed imsüras dal svilup. Las cugnuschentschas da quist process sun gnidas integredas illa preschainta strategia da svilup e dessan gnir transferidas in tuot ils instrumaints relevants (plan directiv regiunel, NPR, program da realisaziun, ledscha pel svilup economic i'l chantun Grischun) scu eir ütilisedas per üna megldra accordaziun cun cun las singulas politicas secturelas. Ultra da que resulta dal process «Agenda 2030 Grischun» per mincha regiun ün plan d’imsüras cun imsüras concepziunelas e progets concrets.